Os principais organismos causantes de mareas vermellas (coloración da auga) nas rías galegas son:
Especie: Mesodinium sp.
Cor: Avermellada
Non Tóxica
Responsable das mareas vermellas máis características en Galicia, a coloración da auga posúe un aspecto sanguinolento.
Especie: Noctiluca scintillans
Cor: Alaranxada
Non Tóxica (aínda que pode acumular toxinas a través das súas presas).
A miúdo son arrastradas cara á beira do mar, onde forman manchas con aspecto aceitoso a finais de verán. Non son tóxicas, aínda que poden producir certa sensación de queimura na pel.
Especie: Lingulodinium polyedrum
Cor: Avermellada
Levemente tóxica (Yesotoxinas).
Causante da primeira marea vermella descrita nas rías galegas por Odón de Bo en 1916, aínda que quen identificou correctamente o organismo responsable foi o naturalista Ramón Sobrino en 1918.
Especie: Gymnodinium catenatum
Cor: Marrón avermellada
Moi tóxica (PSP: toxinas paralizantes).
Responsable da proliferación tóxica de 1976 nas Rías Baixas que propiciou a posta en marcha dun programa de monitoreo de algas tóxicas en Galicia.
Especie: Alexandrium spp.
Cor: Marrón avermellada
Tóxica (PSP: toxinas paralizantes).
As súas proliferacións son máis abundantes nas Rías Altas (p.ex. Ares-Betanzos), onde se citou un caso de coloración no mar no ano 1984.
Especie: Kryptoperidinium foliaceum
Cor: Marrón avermellada
Non tóxica
Frecuente en zonas estuáricas. Observáronse mareas vermellas desta especie na enseada da Ramallosa (Baiona) e no río Ulla.